Der leere Sessel
Text und Musik: Claudia Mitscha-Eibl
1. Einmal wollt ma uns treffen nach so vielen Jahrn
in da gmiatlichen Runde, die ma früher oft warn.
Da hammas erfahrn, du kommst nimmamehr,
ab jetzt bleibt in der Runde dein Sessel leer.
Mia ham alle betroffen auf den Sessel gschaut,
und gfragt hat sichs a jeda, oba kana sagts laut:
Warum bist du scho gangen? Warum bist du fort?
Und bist du wo gelandet, gibts vielleicht so an Ort?

In an Land, wo die Seel si a Hoamat find
und wo wir irgendwann beianander sind,
in dem Land gibts nur Glück, kane Sorgen mehr,
und ka Sessel bleibt leer.

 

2. Und dann samma da gsessen, ham Gschichtn erzählt
üba frühere Zeiten, oba du hast uns gfehlt.
Und mia ham uns erinnert, ham vü an di dacht,
und gwaant hamma alle, oba a vü glacht.
Und mia ham immer wieder auf den Sessel gschaut.
Und dacht hat sichs a jeda, oba kana sagts laut:
Mia hams Gfüh, dass du dasitzt, als warst du net fort,
oda als war ma alle vielleicht an so an Ort:

In an Land, wo die Seel si a Hoamat find
und wo wir irgendwann beianander sind,
in dem Land gibts nur Glück, kane Sorgen mehr,
und ka Sessel bleibt leer.

© Claudia Mitscha-Eibl, A-2100 Korneuburg

zur Übersicht